Michelle Obama: It's Time to Bring Back Our Girls

Mke wa Rais wa Marekani, Michelle Obama akionyesha ujembe wenye maneno "Turudishieni Mabinti Zetu". Michelle alituma picha hii kwenye mtandao wa kijamii wa Twitter

Mke wa Rais wa Marekani Michelle Obama, ameungana na jamii ya kimataifa katika kampeni ya kushinikiza kuachiliwa huru kwa wanafunzi wa kike zaidi ya 200 waliotekwa na kundi la kigaidi la Boko Haram nchini Nigeria. Utekaji huo ulifanyika walipokuwa shuleni kwao, kaskazini mwa Nigeria katika mji wa Chibok, April 15 mwaka huu.

Hata hivyo kiongozi wa Boko Haram mapema wiki hii aliachia video inayomuonesha akisema kuwa anakusudia kuwauza hao wasichana kwakua ameagizwa na Allah kufanya hivyo. Katika vido hiyo inayomuonesha akiongea kwa kujiamini huku akitabasamu, kiongozi huyo amesema atawauza mabinti hao, kwani kuna masoko ya kuuzia watu na ni ruhusa kwa wanawake kuuzwa.

Watu mbalimbali ndani na nje ya Nigeria wamelitaka kundi hilo kuwaachilia huru watoto hao, kwani ni haki yao ya msingi kupata elimu na huduma nyingine za kijamii.

Jengo la shule ya Chibok, inayomilikiwa na Serikali, ambapo utekaji huo ulitokea

Never argue with a Fool

Bunge laanza leo kwa posho mpya

 

Jengo la Bunge la Jamhuri ya Muungano wa Tanzania

Bunge la Bajeti linaanza leo mjini Dodoma huku wabunge wakitarajiwa kuanza kulipwa viwango vipya vya posho, ambazo ni Sh300,000 kwa siku sawa na kiwango wanacholipwa wajumbe wa Bunge Maalumu la Katiba.

Kabla ya kufikia uamuzi wa kupandisha viwango hivyo kwa Sh100,000 zaidi, wabunge walikuwa wakilipwa Sh200,000 kwa siku (yaani Sh70,000 kama posho ya kikao (sitting allowance), Sh80,000 posho ya kujikimu (perdiem) na Sh50,000 ya gharama za usafiri).

Nyongeza hiyo kwa kila mbunge kwa siku, sawa na asilimia 50, italigharimu Bunge la Jamhuri ya Muungano kiasi cha Sh18.5 bilioni kwa siku 52 zilizotengwa kwa ajili ya Bunge la bajeti linalotarajiwa kuhitimishwa Juni 27.

Januari mwaka 2012, Rais Jakaya Kikwete alikataa maombi ya Bunge ya kutaka nyongeza ya posho ipande hadi Sh330,000 na badala yake wabunge hao wakapata nyongeza ya Sh50,000 tu kwa ajili ya usafiri.

Katibu wa Bunge, Dk Thomas Kashililla alipoulizwa kuhusu nyongeza hiyo, hakuthibitisha wala kukanusha, lakini akafafanua kwamba hilo ni suala la uongozi wa Bunge na si la kiutendaji.

“Suala la malipo kuongezeka au kutoongezeka kimsingi siyo kazi ya Ofisi ya Katibu wa Bunge, vipo vyombo vya juu vya uongozi wa Bunge; Kamati ya Uongozi na Tume ya Huduma za Bunge, na vyombo vyote vinaongozwa na Spika. Kwa hiyo, kama kuna nyongeza, sisi tunapewa taarifa tu kwa ajili ya kutekeleza,” alisema Dk Kashililla na kuongeza:

“Hadi sasa sina taarifa rasmi kuhusu suala hilo, ikiwa litafika mezani kwangu kama maelekezo, tutatekeleza kwa mujibu wa maelekezo husika.”

Habari ambazo zimelifikia gazeti hili kutoka vyanzo mbalimbali ndani ya Bunge la Jamhuri ya Muungano wa Tanzania zinasema, uongozi wa muhimili huo umeamua kuanza kulipa kiasi hicho cha fedha kutokana na shinikizo kubwa kutoka kwa wabunge.

Taarifa za kuwapo kwa msukumo wa ajenda ya kupandisha posho za wabunge zilianza kusikika wakati Bunge la Katiba likielekea ukingoni, wakati wabunge walikuwa wakihoji sababu za wajumbe kulipwa kiasi kikubwa cha fedha kwa kazi ileile na katika mazingira yaleyale, wakati wabunge wa Bunge la Jamhuri ya Muungano wakilipwa kiasi kidogo.

“Msingi wa hoja yetu hapa ni kwamba maisha na mazingira ya Dodoma ni yale sasa, leo kwanini wajumbe wa Bunge la Katiba walipwe Sh300,000 sisi tulipwe kidogo kuliko hicho?” alihoji mmoja wa wabunge.

“Na usisahau mwanzoni tu pale (mbunge wa Sumve, Richard) Ndassa alitoa hoja akisema posho hiyo ya Sh300,000 haitoshi kwa kuwa gharama za maisha Dodoma zimepanda... Gharama haziwezi kupanda Bunge la Katiba pekee.”

Mbunge huyo ambaye hakutaka kutajwa jina lake, alisema kama kigezo ni gharama za maisha, mazingira hayo ndiyo wanayokutana nayo wabunge wa Bunge la Jamhuri ya Muungano.

Spika wa Bunge, Anne Makinda licha ya kutafutwa mara kadhaa hakupatikana kuzungumzia suala hilo, lakini Naibu Spika wa Bunge, Job Ndugai alikiri kuwapo kwa msukumo wa wanaotaka nyongeza ya posho, lakini akasema suala hilo halijafanyiwa uamuzi.

“Hata mimi nimesikia kama ulivyosikia wewe. Ni suala ambalo wabunge wamekuwa wakilizungumza, lakini uamuzi ni mchakato si suala la mtu mmoja. Ninavyofahamu mimi uamuzi ulikuwa haujafanyika,” alisema Ndugai.

Awali kulikuwa na taarifa kwamba maombi ya nyongeza ya posho yamepelekwa kwa Rais Kikwete kwa ajili ya kupata idhini yake, lakini Katibu Mkuu Kiongozi, Balozi Ombeni Sefue alisema hakukuwa na maombi ya aina hiyo. “Kusema kweli maombi hayo sijayaona. Kama yakija tutayashughulikia kwa mujibu wa sheria na taratibu zilizopo maana ukweli ni kwamba nyongeza zinategemea uwezo wa Serikali kulipa kwa maana ya bajeti kama ipo,” alisema Sefue.

Hata hivyo, gazeti hili limethibitishiwa kuwa uongozi wa Bunge umelazimika kubana sehemu ya matumizi yake katika maeneo mengine hivyo kuwezesha kupatikana kwa kiasi cha fedha kinachotakiwa kwa ajili ya nyongeza wakati wa Bunge la Bajeti.

“Bunge lina bajeti yake kwa hiyo walichofanya ni kupunguza matumizi katika sehemu nyingine kama vile safari na hilo limefanyika, hivyo uwezo wa kulipa kiasi hicho kinachotakiwa upo,” alisema mpashaji wetu kutoka ndani ya Ofisi za Bunge na kuongeza:

“Hilo linafanyika kwa kipindi hiki cha Bunge la Bajeti, baada ya hapo nyongeza hiyo itazingatiwa katika mapendekezo ya bajeti ya 2014/15”.

Mmoja wa maofisa wa Bunge aliliambia gazeti hili kwamba hakukuwa na njia ya uongozi wa taasisi hiyo kukataa kulipa fedha hizo kutokana na ukweli kwamba wangepata wakati mgumu kutoa maelezo kwa wabunge.

Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi licha ya kukiri kuwapo kwa madai ya wabunge kutaka nyongeza ya posho, naye hakuwa tayari kulizungumzia kwa undani kwa maelezo kwamba yeye hakuwapo nchini kwa muda mrefu.

“Mimi kwa kweli nisamehe tu ndugu yangu. Sikuwapo nchini kwa muda maana nilikwenda nje kwa ajili ya masuala ya afya, hivyo sijapata muda wa kufahamu kilichozungumzwa na kukubaliwa kuhusu suala hilo,” alisema Lukuvi.

Chanzo: Gazeti la Mwananchi 

Safari ya Basi kutoka Lilongwe hadi Dar - Sehemu ya Kwanza

Niliwahi kupata bahati ya kusafiri kwa basi kati ya Lilongwe, Malawi na Dar es Salaam, Tanzania. Ilituchukua jumla ya masaa 30 kusafiri kutoka Lilongwe hadi Dar. Kimsingi ilikua ndio safari yangu ya kwanza ndefu kiasi hicho kusafiri kwa basi.

Safari ilianzia Devil Street, Lilongwe saa moja kamili jioni (kwa saa za Malawi, sawa na saa mbili usiku kwa saa za Tanzania) kwa basi la kampuni ya TAQWA. Kilichonifurahisha wakati wa kuanza safari ni imani waliyonayo Wamalawi kwa Mungu kwani safari yetu ilianza kwa sala. In fact, nimewahi kupata fursa ya kuhudhuria mikutano na vikao kadhaa vya kiofisi nchini Malawi, tena ni vya kiserikali, ambapo asilimia kubwa ya vikao hivyo vilikuwa vikifunguliwa kwa sala! Nchini kwetu vikao vinavyofunguliwa kwa sala labda ni vya taasisi za kidini.

Basi la kampuni ya TAQWA tulilosafiri nalo

Kitu nilichogundua haraka haraka ni kuwa wengi wa abiria waliokua kwenye TAQWA walikua wafanyabiashara. Wanachukua mzigo Dar (hasahasa kariakoo) wanapeleka Malawi. Walikuwemo wafanyabiashara wa kitanzania na kimalawi. Nikagundua kumbe raia wa nchi hizi mbili wana uhusiano mzuri wa kibiashara.

Kituo cha kwanza kusimama kilikua katika hoteli ya Seven Eleven iliyopo katika jiji la Lilongwe. Pale tulisimama kwa ajili ya kununua chakula. Ni ruhusa kwa magari ya abiria kusafiri usiku katika nchi ya Malawi, kwa maana nyingine safari ni masaa 24. 

Baada ya abiria kujinunulia vyakula vyao kwa ajili ya usiku ule, safari ilianza tena kwenye saa mbili kasorobo hivi za Malawi. Tulifika Mzuzu kwenye saa saba za usiku ambapo basi lilisimama kupakia abiria wengine waliokua wakielekea Tanzania.Nakumbuka kabla ya kufika Mzuzu tulisimamishwa njiani na askari kama mara mbili tu.

Baada ya Mzuzu hali ilibadilika. Ilikua ni mwendo wa kukutana na mageti ya askari wa uhamiaji. Kuna mahali tulisimamishwa, usiku huo, tukaamrishwa wote tushuke chini ili wakague hati zetu za kusafiria (Passport). Ilikua ni usiku sana, halafu ni porini na mahali pale palikua na baridi kali sana. Abiria waliwaomba askari hao waingie kukagua hizo hati ndani ya gari kwa maelezo kuwa nje hapakuwa na usalama wa kutosha na pia kulikua na baridi sana.

Askari walivosikia vile wakamuamrisha dereva kuzima gari, na kutueleza kuwa kama hamtaki kushuka mtalala hapahapa. Abiria walijaribu kuweka mgomo wa kushuka lakini askari hawakuwaelewa. Baada ya dakika kama 15 hivi tuliamua kushuka huku abiria wakiwatolea wale askari maneno makali. Kuna mama mmoja, mmalawi, alisikika akisema (kwa Kichewa), "nyie askari wa Malawi mnapenda sana kuabudiwa, nendeni Tanzania mkajifunze kwa wenzenu... sisi sio wahamiaji haramu, ni Wamalawi wenzenu kwanini mnatutesa na baridi hivi usiku huu..?". Mwanaume mwingine mtanzania yeye ndio kidogo alete tafrani. Aliwaambia wale askari kwa Kiswahili (sijui alikua anafikiri hawajui Kiswahili au aliamua tu kusema ili liwalo na liwe), "...mnashindwa  kulala makwenu mnakuja kukesha huku porini... nchi yenyewe maskini, haina tembo, haina almasi, haina dhahabu, haina rasilimali zozote... mtu atakuja kuzamia huku kutafuta nini... wenzenu wanatafuta kuungana nyie mnatafuta kujitenga!..."  Kuna askari mmoja alikua juu ya gari (Pick up) akayasikia yale maneno, aliruka chini kama mshale kuja kumkamata yule bwana, ila abiria kwa umoja wao walimzingira yule askari wakimzuia asimkamate. Mwishowe askari akaona isiwe taabu akaachana nae.

Zoezi la ukaguzi wa Passport lilikua la abiria mmoja baada ya mwingine, ukishakaguliwa ndio unaruhusiwa kuingia ndani ya gari. Baada ya hilo zoezi safari iliendelea, ila kama kawaida mageti ya ukaguzi yalikua mengi japo hatukuwahi tena kushushwa chini. Safari iliendelea mpaka tulipofika Songwe, mpakani mwa Malawi na Tanzania kwenye saa kumi na mbili kasorobo hivi alfajiri kwa masaa ya Tanzania.

Geti la mpakani upande wa Malawi likiwa bado limefungwa, asubuhi hiyo

Basi tulilokuwa tukisafiri nalo likisubiri geti la mpakani lifunguliwe

Magari mengine yakiwa mpakani upande wa Malawi yakisubiri geti la mpaka lifunguliwe

Itaendelea Sehemu ya Pili.....